ലോകത്തിലെ ഏറ്റവും വലിയ കോൺക്രീറ്റ് അണക്കെട്ടുകളിലൊന്നാണ് ഇതയ്പു അണക്കെട്ട്. തെക്കേ അമേരിക്കയിലെ ബ്രസീലിനേയും പരാഗ്വയേയും വേർതിരിക്കുന്ന പരാന എന്ന നദിക്കു കുറുകേയാണ് ഇത്. ഇതയ്പു ബൈനാസിയോണൽ എന്ന കമ്പനിയാണ് ഇത് നിർമ്മിക്കുന്നത്. ഗ്വാറാനി ഭാഷയിൽ ഇതയ്പു എന്ന വാക്കിനർത്ഥം 'പാടുന്ന കല്ലുകൾ' എന്നാണ്. അണക്കെട്ട് നിലകൊള്ളുന്നതിനടുത്തുണ്ടായിരുന്ന ഒരു തുരുത്തിന്റെ പേരാണിത്. ബ്രസീലും പരാഗ്വയും സംയുക്തമായാണ് അണക്കെട്ടിന്റെയും ജലവൈദ്യുതപദ്ധതിയുടെയും ഭരണനിർവഹണം നടത്തുന്നത്. പതിന്നാലു വർഷം 40000 ജോലിക്കാർ പണിതാണ് അണക്കെട്ട് പൂർത്തിയാക്കിയത്. ഉത്പാദനം വച്ചു നോക്കിയാൽ ലോകത്തിലെ ഏറ്റവും വലിയ ജലവൈദ്യുത പദ്ധതിയാണ് ഇതയ്പു. 20 ജനറേറ്ററുകളിൽ നിന്നായി 14000 മെഗാവാട്ട് വൈദ്യുതി നിർമ്മിക്കാം. 196 മീറ്റർ ഉയരമുണ്ട് അണക്കെട്ടിന്. ഇതയ്പുവിന്റെ സ്പിൽവേയിലൂടെ പ്രവഹിക്കുന്നത് സെക്കന്റിൽ 62,200 ഘനമീറ്റർ ജലമാണ്.