ഖത്തറിൻറെ തലസ്ഥാനമായ ദോഹയിലെ പ്രധാന വിമാനത്താവളമാണ് ഹമദ് അന്താരാഷ്ട്ര വിമാനത്താവളം (IATA: DOH, ICAO: OTHH) (Arabic: مطار حمد الدولي, Maṭār Ḥamad al-Duwalī ). ഈ വിമാനത്താവളത്തിന് മുൻപ് ദോഹ അന്താരാഷ്ട്ര വിമാനത്താവളം ആയിരുന്നു ഖത്തറിലെ പ്രധാന അന്താരാഷ്ട്ര വിമാനത്താവളം. യാത്രക്കാരുടെ ബാഹുല്യം നിമിത്തം നിർമ്മിച്ചതാണ് ഹമദ് വിമാനത്താവളം.
2003-ലാണ് പുതിയ വിമാനത്താവളത്തിനായി രൂപരേഖ തയ്യാറാക്കാൻ തുടങ്ങിയത്. യാത്രക്കാരുടെ വർദ്ധനവും ചരക്കു ഗതാഗതവും പഴയ ദോഹ വിമാനത്താവളത്തിന് താങ്ങാൻ പറ്റുന്നുണ്ടായിരുന്നില്ല. ഇത് മറികടക്കാൻ വേണ്ടിയാണ് ഹമദ് വിമാനത്താവളം നിർമ്മിച്ചത്.
ബെക്ടെൽ കോർപറേഷനെയാണ് നിർമ്മാണത്തിനായി അന്നത്തെ സ്റ്റിയറിംഗ് കമ്മറ്റി നിയോഗിച്ചത്. ഈ കരാറിൽ രൂപരേഖ, നിർമാണം, പ്രൊജക്റ്റ് മാനേജ്മന്റ് എന്നിവ ഉൾപ്പെടുന്നു . ടെർമിനലുകളും കോൺകോർസും രൂപകല്പന ചെയ്തത് ഹോക് ആണ്.
യാത്രക്കാർക്ക് വിമാനത്താവളത്തിനകത്തു സഞ്ചരിക്കേണ്ടുന്ന ദൂരം കുറയ്ക്കാനായി പ്രധാന യാത്രാ ടെർമിനൽ ദീർഘവൃത്താകൃതിയിൽ ആണ് നിർമ്മിച്ചിട്ടുള്ളത്. യാത്രാ ടെർമിനലിന്റെ വിസ്തീർണ്ണം 600,000 ചതുരശ്ര മീറ്ററാണ്. എയർബസിന്റെ എ380 വിമാനത്തിനായി പ്രത്യേകം നിർമ്മിച്ചത് എന്ന വിശേഷണം ഹമദ് വിമാനത്താവളത്തിന് ഉണ്ട്. നിർമ്മാണത്തിനിടയിൽ 6.2 മില്യൺ ക്യൂബിക് മീറ്റർ അവശിഷ്ടം നീക്കം ചെയ്തു.
ഇപ്പോൾ നിർമ്മാണത്തിൽ ഇരിക്കുന്ന ദോഹ മെട്രോ പദ്ധതി പ്രകാരം രണ്ട് മെട്രോ സ്റ്റേഷനുകൾ വിഭാവനം ചെയ്തിട്ടുണ്ട്.
ഹമദ് വിമാനത്താവളത്തിൽ ഒരു യാത്ര ടെർമിനലും നാലു കോൺകോർസും പിന്നെ രാജ കുടുംബാഗംൾക്കായി ഒരു ടെർമിനൽ (എമിരി ടെർമിനൽ) എന്നിവ ആണ് ഉള്ളത്.
രണ്ടാമത് ഒരു ടെർമിനൽ നിർമ്മിക്കാൻ പദ്ധതി ആലോചന നടക്കുന്നു. 2022-ലെ ഫിഫ ലോകകപ്പ് ഫുട്ബോൾ മത്സരം മൂലം യാത്രക്കാരുടെ വർദ്ധനവ് ഉണ്ടാകും എന്നതിനാലാണ് ഈ പുതിയ ടെർമിനൽ നിർമ്മിക്കാൻ ആലോചിക്കുന്നത്.
രാജ കുടുംബാഗങ്ങൾ, ഉന്നത ഉദ്ദ്യോഗസ്ഥർ, നയതന്ത്ര പ്രതിനിധികൾ എന്നിവർക്കായിട്ടാണ് ഈ ടെർമിനൽ നിർമ്മിച്ചിരിക്കുന്നത്. പ്രത്യേക ഗേറ്റുകളും പാർക്കിംഗ് സ്ഥലങ്ങളും ഉണ്ട് ഈ ടെർമിനലിന്. മജ്ലിസുകൾ, ബിസിനസ് ലോഞ്ചുകൾ, മീറ്റിംഗ് മുറികൾ മുതലായവയും നിർമ്മിച്ചിരിക്കുന്നു.
യാത്രക്കാർക്ക് വിവിധങ്ങളായ സാധങ്ങൾ വാങ്ങാൻ ഉള്ള അവസരം ഖത്തർ ഡ്യൂട്ടി ഫ്രീ ഒരുക്കുന്നു.
ഹമദ് വിമാനത്താവളത്തിൽ രണ്ടു റൺവേ ഉണ്ട്. സമാന്തരമായി വിമാനത്താവളത്തിന്റെ രണ്ടു വശത്തും ആയിട്ട് രണ്ട് കിലോമീറ്റർ അകലത്തിൽ ആണ് ഇവ നിർമ്മിച്ചിട്ടുള്ളത്. ആദ്യത്തേത് 4,850 m × 60 m (15,910 ft × 200 ft) നീളവും രണ്ടാമത്തേതിന് 4,250 m × 60 m (13,940 ft × 200 ft) നീളവും ഉണ്ട്. ഇത് പശ്ചിമേഷ്യയിലെ ഏറ്റവും വലിയ റൺവേ ആണ്.