ലഗൂണ ബീച്ച്, അമേരിക്കൻ ഐക്യനാടുകളിലെ സംസ്ഥാനമായ കാലിഫോർണിയയിലെ തെക്കൻ ഓറഞ്ച് കൗണ്ടിയിൽ സ്ഥിതി ചെയ്യുന്ന ഒരു കടൽത്തീര റിസോർട്ട് നഗരമാണ്. വർഷം മുഴുവനുമുള്ള സൌമ്യമായ കാലാവസ്ഥ, മനോഹരമായ അഴിമുഖങ്ങൾ, പാരിസ്ഥിതിക സംരക്ഷണം, കലാഹൃദയമുള്ള സമൂഹം എന്നിവയുടെ പേരിൽ ഈ തീരദേശ നഗരം അറിയപ്പെടുന്നു. 2010 ലെ യു.എസ്. സെൻസസിൽ ഈ നഗരത്തിലെ ജനസംഖ്യ 22,723 ആയിരുന്നു. ചരിത്രപരമായി പാലിയോ ഇന്ത്യൻസ്, തോങ്ക്വ ജനങ്ങൾ എന്നിവരുടേയും പിന്നീട് മെക്സിക്കോയുടെ ഭരണത്തിലുമായിരന്ന ഈ പ്രദേശം, മെക്സിക്കോ-അമേരിക്കൻ യുദ്ധത്തിനു ശേഷം അമേരിക്കയുടെ നിയന്ത്രണത്തിലായിത്തീർന്നു.
