മധ്യ അമേരിക്കയിലെ ഏറ്റവും വലിയ ദ്വീപാണ് പനാമയിലെ വെരാഗ്വാസ് പ്രവിശ്യയിലുള്ള കൊയിബ. പസഫിക് തീരത്താണ് ഇതിന്റെ സ്ഥാനം. വെരഗ്വാസ് പ്രവിശ്യയിലെ മൊണ്ടിജോ ജില്ലയിലെ ഭാഗമാണിത്.
12,000 വർഷം മുമ്പെങ്കിലും പനാമയുടെ മുഖ്യകരഭാഗത്തുനിന്നു വേർപെട്ടു പോയതാണ് കൊയിബ ദ്വീപ്. 1560 വരെ അമേരിന്ത്യരുടെ കേന്ദ്രമായിരുന്ന ഇവിടം സ്പാനിഷ് കുടിയേറ്റക്കാർ കീഴടക്കി. 1918-ൽ ഇവിടെ ഒരു തടവറയും പീനൽ കോളനിയും സ്ഥാപിച്ചു. ഒമാർ തോറിഹോസിന്റെയും നൊറിയേഗയുടെയും സർവാധിപത്യ ഭരണക്കാലത്ത് കുപ്രസിദ്ധമായിരുന്നു ഈ തടവറ. പിൻക്കാലത്ത് ജയിൽ അടച്ചുപൂട്ടി. 2005-ൽ കൊയിബയെ ലോകപൈതൃക കേന്ദ്രമായി യുനെസ്കോ പ്രഖ്യാപിച്ചു.
ദ്വീപിലെ വനപ്രദേശത്ത് ജാഗ്വർ ഉൾപ്പെടെയുള്ള മാർജ്ജാര ജാതികൾ പലതുണ്ട്. അപൂർവ്വ പക്ഷികളുമുണ്ട്. ദ്വീപിനു ചുറ്റുമുള്ള പവിഴപ്പുറ്റ് റീഫ്, അമേരിക്കൻ വൻകരകളിലെ പസഫിക് തീരത്തുള്ള ഏറ്റവും വലിയ പവിഴപ്പുറ്റാണ്.