ലാവോസിലെ ഒരു പ്രധാന നഗരമാണ് ലുവാങ് പ്രബാങ്(ലാവോ ഭാഷ: ຫຼວງພຣະບາງ;ഇംഗ്ലീഷ്: Luang Prabang). നാം ഖാൻ, മെക്കോങ് എന്നീ നദികളുടെ സംഗമസ്ഥാനത്താണ് ലുവാങ് പ്രബാങ് പട്ടണം സ്ഥിതിചെയ്യുന്നത്. ഏകദേശം 50000ത്തോളം ജനങ്ങൾ വസിക്കുന്ന പട്ടണമാണ് ഇത്.യുനെസ്കോയുടെ ലോക പൈതൃക പട്ടികയിലും ലുവാങ് പ്രബാങ് പട്ടണം സ്ഥാനം നേടിയിട്ടുണ്ട്.
ആദ്യകാലത്ത് ലുവാങ് പ്രബാങ് എന്നുതന്നെ പേരുള്ള രാജവംശത്തിന്റെ ആസ്ഥാനമായിരുന്നു ഈ പട്ടണം. ചിയാങ് തോങ്(Chiang Thong) എന്ന പഴയപേരിലും ലുവാങ് പ്രബാങ് അറിയപ്പെടാറുണ്ട്. 1975-ൽ കമ്മ്യൂണിസ്റ്റ് ഭരണകൂടം അധികാരത്തിൽ എത്തുന്നതുവരെ ലാവോസ് സാമ്രാജ്യത്തിന്റെ രാജകീയ ആസ്ഥാനവും ഭരണ സിരാകേന്ദ്രവുമായിരുന്നു ലുവാങ് പ്രബാങ്.
നിരവധി ബുദ്ധക്ഷേത്രങ്ങളും ബുദ്ധവിഹാരങ്ങളുമുള്ള ഒരു പട്ടണമാണ് ലുവാങ് പ്രബാങ്. ബുദ്ധഭിക്ഷുക്കൾ ലുവാങ് പ്രബാങിലെ തെരുവുകളിലെ ഒരു സ്ഥിരം കാഴ്ചയാണ്. ഇന്ന് ലാവോസിലെ ഒരു പ്രധാന വിനോദസഞ്ചാരകേന്ദ്രമാണ് ഈ പൈതൃക നഗരം. പാശ്ചാത്യരാജ്യങ്ങളിൽനിന്നുള്ള നിരവധി സഞ്ചാരികൾ ലുവാങ് പ്രബാങിൽ എത്തുന്നു.