ജപ്പാനിലെ വടക്കൻ ഹോൺഷുവിലുള്ള ഒരു ലോക പൈതൃക കേന്ദ്രമാണ് ഷിറിക്കാമി-സാൻചി(ജാപ്പനീസ്: 白神山地;ഇംഗ്ലീഷ്: Shirakami-Sanchi). നിരവധി സവിശേഷതകളുള്ള ഒരു പ്രദേശമാണ് ഷിറിക്കാമി-സാൻചി. 1,300ച.കി.മീ യോളം വരുന്ന വനമേഖലയിലെ 169.7 ച.കി.മീ ഭൂഭാഗത്തെയാണ് യുനെസ്കോ ലോകപൈതൃകപട്ടികയിൽ ഉൾപ്പെടുത്തിയിരിക്കുന്നത്. സീബോൾഡ്സ് ബീച്ച് എന്നയിനം ബീച് വൃക്ഷങ്ങൾ നിറഞ്ഞ വനമേഖലയാണ് ഇവിടത്തെ ഒരു പ്രത്യേകത. ശൈത്യകാലത്ത് പൂർണ്ണമായും ഇലപ്പൊഴിക്കുന്ന ഈ മരങ്ങൾ ശൈത്യത്തിന്റെ അവസാനത്തോടെ ഒരു ശിശിരനിദ്രയിൽനിന്നെന്നപോലെ ഉണരുകയും വീണ്ടും ഇലകൾ തളിർക്കുവാൻ ആരംഭിക്കുകയും ചെയ്യുന്നു.
ജപ്പാനിൽനിന്നും ആദ്യമായി ലോകപൈതൃകപട്ടികയിൽ ഉൾപ്പെടുത്തിയ ചില സ്ഥലങ്ങളിൽ ഒന്നാണ് ഷിറിക്കാമി-സാൻചി. 1993-ലായിരുന്നു ഇത്. ഇന്നും ഈ വനമേഖല വളരെയേറെ ശ്രദ്ധയോടുകൂടി സംരക്ഷിച്ചു വരുന്നു.